Golaha Wasiirada oo ansixiyey heshiis dhinaca amaanka ah oo dhex maray Dowladaha Soomaaliya iyo Sacuudiga
Khamiis, May 15, 2025 (HOL) – Golaha Wasiirrada Xukuumadda Soomaaliya ayaa maanta ansixiyey heshiis is afgarad dhinaca Milatariga iyo amniga ah oo dhex maray Dowladaha Soomaaliya iyo Sacuudiga, kaas oo golaha ay usoo gudbisay Wasaaradda Gaashaandhigga Soomaaliya.
Heshiiska ay maanta ansixiyeen Golaha wasiirada ayaa ujeedadiisu tahay in la xoojiyo qaab dhismeedka amniga labada dal, taasoo u ogolaanaysa habab isku xiran oo wax looga qabanayo caqabadaha amniga ee gobolka.
Khubarada Gobolka kusugan ayaa heshiiskan u arka tallaabo istiraatijiyad ah oo sare u qaadaysa awoodda labada dal ay wax uga qaban karaan arrimaha ammaanka, Waxaa la filayaa in ay furto waji cusub oo iskaashiga dhinacyada kale, oo ay ku jiraan ganacsiga iyo isdhaafsiga dhaqanka, si loo xoojiyo xiriirka ka dhexeeya Soomaaliya iyo Boqortooyada Sacuudi Carabiya.
Ugu dambeyn Shirka Golaha oo uu shir guddoomiyay Ra’iisul Wasaaraha Xukuumadda
Federaalka Soomaaliya Xamse Cabdi Barre, ayaa lagu soo bandhigay
warbixinno ku saabsan xaaladda guud ee amniga, guulaha laga gaaray
dagaalka Alshabaab, warbixin ku saabsan arrimaha Xajka iyo sidoo kale
guddiga taakuleynta dagaalka lagula jiro kooxaha Alshabaab iyo Daacish oo warbixin
laga dhageystay.
