Kulan ka dhacay magaalada Muqdisho oo ay soo qabanqaabiyeen Hay’adda Qaramada Midoobay ee Taageerada Ku-meel-gaarka ah…
Wararka Soomaaliya
Kulan ka dhacay magaalada Muqdisho oo ay soo qabanqaabiyeen Hay’adda Qaramada Midoobay ee Taageerada Ku-meel-gaarka ah ee Soomaaliya (UNTMIS), kana qeyb galeen Midowga Yurub, safaaradaha Ingiriiska, Mareykanka iyo Turkiga, ayaa diiradda lagu saaray sidii loo xoojin lahaa wadahadallada u dhexeeya Dowladda Federaalka Soomaaliya iyo saamileyda siyaasadda.
Dhinaca Golaha Mustaqbalka, waxaa la soo bandhigay hindise doorasho oo ku saleysan nidaamka qof iyo cod, iyadoo la qorsheynayo in diiwaangelinta iyo codayntu ay dalka oo dhan ka dhacaan hal mar iyo hal maalin. Hindisahan ayaa sidoo kale soo jeedinaya in doorashadu ku sii socoto hab-qaybsiga awoodda ee 4.5, isla markaana ay maamulaan laba guddi doorasho oo kala matalaya Dowladda Federaalka Soomaaliya (DFS) iyo Dowlad Goboleedyada (DG).
Golaha Mustaqbalka ayaa aaminsan in habkani uu noqon karo xal ku-meel-gaar ah oo mideyn kara dhinacyada siyaasadda, maadaama uu isku darayo nidaamka qof iyo cod iyo qaab-dhismeedka awood-qaybsiga ee hadda jira. Waxay sidoo kale sheegayaan in wada-maamulka guddiyada doorashadu uu kordhin karo kalsoonida dhinacyada kala duwan.
Faahfaahinta
Dhanka kale, Dowladda Federaalka Soomaaliya iyo ururrada siyaasadeed ee Nabad & Nolol iyo Golaha Midnimo waxay ku adkeysanayaan hannaan doorasho oo isna ku dhisan qof iyo cod, balse ku saleysan nidaamka xisbiyada siyaasadeed. Qorshahoodu wuxuu dhigaya in dalka oo dhan ay maamusho hal guddi doorasho oo qaran, taas oo ay ku doodayaan inay sare u qaadeyso mideynta maamulka doorashada iyo hufnaanta geeddi-socodka.
Wararka.so waxay kuu soo tebineysaa wararka ugu dambeeyey ee Soomaaliya iyo caalamka. Si aad ula socoto wararkii ugu dambeeyey, booqo boggayaga.
