Dowladda Federaalka Soomaaliya ayaa sheegtay in Ciidanka Xoogga Dalka Soomaaliyeed, oo kaashanaya saaxiibada caalamka, ay 1-dii iyo 2-dii Luulyo fuliyeen duqeymo iyo howlgallo lagu bartilmaameedsaday fariisimo ay kooxda Al-Shabaab ku lahayd deegaannada Tawakal, Nuun Garre iyo Ugunji ee gobolka Shabeellaha Hoose.
Wararka Soomaaliya
Sida lagu sheegay war-saxaafadeedka Wasaaradda Gaashaandhigga Soomaaliya, howllgalladaas waxaa lagu dilay 27 xubnood oo ka tirsanaa Al-Shabaab, halka tiro kale lagu dhaawacay.
War-saxaafadeedka ayaa sidoo kale lagu sheegay in howlgalka lagu burburiyay gaadiid, hub iyo saanad ciidan oo kooxda ay u adeegsan jirtay abaabulka iyo fulinta weerarrada.
Wasaaradda Gaashaandhigga ayaa sheegtay in howlgalladan ay qeyb ka yihiin dadaallada lagu ciribtirayo Al-Shabaab, iyadoo u mahadcelisay saaxiibada caalamka ee taageerada ka geysta la-dagaallanka argagixisada.
Faahfaahinta
Dowladdu waxay mar kale xaqiijisay inay sii wadi doonto howlgallada ka dhanka ah Al-Shabaab ilaa laga ciribtiro khatarta ay ku hayaan shacabka Soomaaliyeed.
Wararka.so waxay kuu soo tebineysaa wararka ugu dambeeyey ee Soomaaliya iyo caalamka. Si aad ula socoto wararkii ugu dambeeyey, booqo boggayaga.
