Golaha Mustaqbalka Soomaaliyeed ayaa si adag uga horyimid doorashada Guddoomiyaha Golaha Shacabka, Cabdulqaadir Maxamed Nuur (Jaamac), iyagoo cambaareeyay wixii maanta ka dhacay xarunta baarlamaanka.
Wararka Soomaaliya
Golaha ayaa sheegay in muddo-xileedkii dastuuriga ahaa ee baarlamaanka Soomaaliya uu ku ekaa 14-kii April 2026, sidaas darteedna uusan laheyn wax sharciyad dastuur iyo mid siyaasadeed oo uu ku dooran karo hoggaamiye cusub.
“Golaha Mustaqbalka Soomaaliyeed (GMS) wuxuu si adag u cambaaraynayaa, una diiddan yahay doorasho-ku-sheegga Guddoomiyaha Golaha Shacabka ee muddo-xileedkiisu dhammaaday,” ayaa lagu yiri war-saxaafadeed kasoo baxay Golaha Mustaqbalka Soomaaliyeed.
Golahan oo ay ku mideysan yihiin qaar kamid ah hoggaamiyeyaasha mucaaradka iyo madaxda Puntland iyo Jubaland ayaa sidoo kale Madaxweyne Xasan Sheekh ku eedeeyay inuu doonayo in uu gacanta ku dhigo hannaanka doorashada, uuna hor istaago tartamayaasha awoodda leh, isla markaana uu natiijada horay u sii jaan-gooyo.
Faahfaahinta
Golaha ayaa mar kale adkeeyay in khilaafka doorashooyinka Soomaaliya aan lagu xallin karin tallaabooyin hal dhinac ah, ku-takrifal awoodeed iyo hannaan natiijadiisa horay loo sii go’aamiyey.
“Jidka keliya ee lagu soo celin karo sharcinimada dastuuriga ah iyo kalsoonida siyaasadeed waa heshiis loo dhan yahay oo saldhig u noqda doorasho heshiis lagu yahay, laguna kalsoonaan karo hannaankeeda iyo natiijadeeda,” ayaa lagu yiri war-saxaafadeedka Golaha Mustaqbalka Soomaaliyeed.
Hoos ka aqriso war-saxaafadeedka
Saamaynta
Golaha Mustaqbalka Soomaaliyeed (GMS) wuxuu si adag u cambaaraynayaa, una diiddan yahay doorasho-ku-sheegga Guddoomiyaha Golaha Shacabka ee muddo-xileedkiisu dhammaaday.
Muddo-xileedkii dastuuriga ahaa ee Baarlamaanka Federaalka Soomaaliya wuxuu ku ekaa 14-kii Abriil 2026, sidaa darteed Baarlamaanku ma lahan sharciyad dastuur iyo mid siyaasadeed oo uu ku dooran karo guddoomiye cusub, mana yeelan karo awood muddo kordhin.
Haddii uu Madaxweyneha muddo-xileedkiisu dhammaaday ugu tafaralay doorasho-ku-sheeggaan wuxuu tusaale cad u yahay qorshaha uu doonayo in uu ku maareeyo doorashooyinka soo socda ee Baarlamaanka Federaalka iyo Madaxweyneha, taasoo uu doonayo in uu gacanta ku dhigo hannaanka doorashada, hor istaago tartamayaasha awoodda leh, natiijadana horay loo sii jaan-gooyo.
Wararka.so waxay kuu soo tebineysaa wararka ugu dambeeyey ee Soomaaliya iyo caalamka. Si aad ula socoto wararkii ugu dambeeyey, booqo boggayaga.
