Somaliland iyo Israa’iil oo tallaabo kale qaaday + Sawirro
Tel Aviv (Caasimada Online) – Maamulka Somaliland iyo Israa’iil ayaa tallaabo cusub qaaday si ay u xoojiyaan iskaashigooda, iyagoo maanta furay Madashii ugu horreysay ee Ganacsiga Somaliland iyo Israa’iil, taas oo lagu qabtay magaalada Tel Aviv.
Madashan oo ay wada qaban-qaabiyeen Machadka Dhoofinta (Institute of Export) iyo Waaxda Dhaqaalaha ee Wasaaradda Arrimaha Dibedda Israa’iil, ayaa waxaa ka qaybgalay Madaxweynaha Somaliland, Mudane Cabdiraxmaan Maxamed Cabdillaahi (Cirro) iyo wefdigiisa oo booqasho ku jooga Israa’iil. Sidoo kale, madashu waxay soo ururisay in ka badan laba boqol oo ka mid ah hoggaamiyeyaasha ganacsiga, maalgashadayaasha iyo wakiillada shirkadaha waaweyn ee Israa’iil.
Ujeeddada Madasha Ganacsiga Somaliland iyo Israa’iil (Somaliland-Israel Business Forum) ayaa ah xoojinta iskaashiga dhaqaale ee labada dhinac, iyada oo diiradda la saarayo ballaarinta fursadaha ganacsi, maalgashiga tooska ah, iyo iskaashi dhab ah oo dhinacyo badan leh oo dhex mara labada dal iyo shacabka.
Waxaa intaa dheer, si qoto dheer ayaa looga hadlay sidii loo fududeyn lahaa isu-socodka ganacsiga iyo abuurista jawi dhiirrigelinaya maalgashiga labada dal. Labada dhinac ayaa sidoo kale is-weydaarsaday fikrado la xiriira horumarinta kaabeyaasha dhaqaalaha, tamarta, biyaha, beeraha, caafimaadka, isgaadhsiinta iyo adeegyada casriga ah, kuwaas oo loo arko tiirarka ugu muhiimsan ee kobaca dhaqaalaha.
Somaliland iyo Israa’iil ayaa isla gartay in la xoojiyo muhiimadda ay leedahay gudbinta aqoonta iyo tiknoolajiyadda casriga ah (technology transfer), taas oo la filayo in ay door weyn ka qaadato tayeynta adeegyada iyo kobcinta xirfadaha shaqo ee dalka.
Madaxweyne Cabdiraxmaan Cirro oo madasha ka hadlay ayaa xaqiijiyey in ganacsatada, maalgashadayaasha iyo halabuuraha reer Israa’iil aanu keliya albaabada ganacsi ee Somaliland u furnayn, balse qalbiyada ummadda Jamhuuriyadda Somaliland ay u furan yihiin. Sidoo kale, wuxuu xaqiijiyey in Somaliland ay diyaar u tahay soo dhaweynta ganacsatada iyo maalgashiga Israa’iil, isla markaana ay tahay dal leh fursado istaraatiiji ah oo ku yaalla marin muhiim ah oo ganacsiga caalamka ah, taas oo ka dhigaysa goob soo jiidasho u leh maalgashadayaasha.
Dhismaha madashani ayaa astaan u ah xoojinta xiriirka dhaqaale ee Somaliland iyo Israa’iil, iyo in si dhab ah loo xaqiijiyo iskaashi dhaqaale oo wax-ku-ool ah, kaas oo horseedi kara horumar nacfi leh iyo is-faham qoto dheer oo labada dhinac ah.
 – Maamulka Somaliland iyo Israa’iil ayaa tallaabo cusub qaaday si ay u…){kind=link}