Golaha Aqalka Sare ee Baarlamaanka Federaalka Soomaaliya ayaa maanta cod aqlabiyad leh ku ansixiyay hindise-sharciyeedka la-dagaallanka burcad-badeedda iyo ka-hortagga afduubka.
Wararka Soomaaliya
Hindise-sharciyeedkan ayaa ka mid ah xeerarka muhiimka ah ee lagu xoojinayo dadaallada Soomaaliya ee ka dhanka ah burcad-badeedda iyo afduubka, gaar ahaan dambiyada ka dhaca xeebaha iyo gudaha dalka.
Kulanka Golaha Aqalka Sare ayaa lagu soo bandhigay qodobbada hindise-sharciga, kaddibna waxaa loo gudbay codeynta ansixintiisa, iyadoo xubnaha Golaha ay aqlabiyad ku meel-mariyeen.
Ansixinta hindise-sharcigan ayaa kusoo aadeysa xilli Soomaaliya ay waddo dadaallo lagu xoojinayo amniga badda iyo ilaalinta xeebaha, xilli kooxaha burcad-badeedda Soomaalida ay muddooyinkii dambe kordhiyeen afduubka maraakiibta.
Faahfaahinta
Hindise-sharcigu ayaa sidoo kale wuxuu diiradda saarayaa ka-hortagga afduubka iyo sidii loo heli lahaa hannaan sharci oo wax looga qaban karo falalka noocan ah, iyadoo la xoojinayo awoodda hay’adaha ay khuseyso.
Golaha Aqalka Sare ayaa muddooyinkii dambe ka shaqeynayay ansixinta iyo dib-u-eegista sharciyo kala duwan oo la xiriira maamulka, amniga iyo xoojinta hay’adaha Dowladda Federaalka Soomaaliya.
Si kastaba, ansixinta hindise-sharciyeedkan ayaa loo arkaa tallaabo lagu dhammaystirayo hannaanka sharci ee lagula tacaalayo dambiyada la xiriira burcad-badeedda iyo afduubka, iyadoo la qeexayo mas’uuliyadaha iyo habraacyada khuseeya arrimahaas.
Wararka.so waxay kuu soo tebineysaa wararka ugu dambeeyey ee Soomaaliya iyo caalamka. Si aad ula socoto wararkii ugu dambeeyey, booqo boggayaga.
